जन्मदिनाच्या अनोख्या भेटीने मुख्यमंत्री भारावले

“.... मुख्यमंत्री सहायता निधीसाठी मजुरीतील रक्कम पाठवित आहे !”

मुंबई ( २२ जुलै २०१९ ) : राज्याचे मुख्यमंत्री देवेंद्र फडणवीस यांचा आज जन्म दिन. समाजातील शेवटच्या घटकाच्या उत्थानासाठी कटिबद्ध असलेल्या मुख्यमंत्र्यांना जन्म दिनानिमित्ताने याच शेवटच्या घटकाकडून आज एक वैशिष्ट्यपूर्ण आणि भावस्पर्शी भेट प्राप्त झाली. मुख्यमंत्री वैद्यकीय सहायता निधीतून करण्यात आलेल्या मदतीमुळे कॅन्सरग्रस्त बालकाला जीवनदान मिळाल्याने मोलमजुरी करणाऱ्या पालकांनी कृतज्ञभावनेने मुख्यमंत्री सहायता निधीसाठी 101 रुपयांची मदत पाठविली.

औरंगाबाद जिल्ह्यातील कनकोरी (ता.गंगापूर) येथील वेदांत भागवत पवार हा पाच वर्षीय बालक पित्ताशयाच्या कर्करोगाने पिडीत होता. वेदांतचे वडील वाळूज औद्योगिक वसाहतीत एका कंपनीत काम करतात तर आई शेतात मजुरी करते. अशा अत्यंत सर्वसामान्य कुटुंबातील या बालकाच्या उपचाराचा खर्च पालकांना पेलवणे शक्य नव्हते. त्याच्या पालकांसह नातेवाईकांनी आपल्यापरीने मदत करून त्यावर उपचार सुरु केले. मात्र, या उपचाराचा मोठा खर्च भागविणे अडचणीचे ठरू लागले. पालकांची सारी पुंजी त्यासाठी खर्ची पडली. त्यामुळे पवार कुटुंबीय चिंताग्रस्त झाले. या बालकाची आत्या श्रीमती रेणुका सुनील गोंधळी या नगर जिल्ह्यातील चिंचोली (ता.नेवासा) येथे राहतात. त्यांनी या अडचणीतून मार्ग काढण्यासाठी मोबाईल दूरध्वनी माध्यमातून मदतीसाठी मुख्यमंत्र्यांना संदेश पाठविला. या संदेशाची दखल घेऊन मुख्यमंत्री वैद्यकीय सहायता निधीतून या बालकावरील उपचारापोटी तात्काळ एक लाख 90 हजारांची मदत करण्यात आली. या मदतीमुळे मुंबईतील एसआरसीसी चिल्ड्रन रुग्णालयात वेदांतवर उपचार करणे शक्य झाले. त्यामुळे या बालकाला जीवनदान मिळण्यास मदत झाली.

मुख्यमंत्र्यांच्या संवदेनशीलतेमुळे वेदांतचे कुटुंबीय भारावून गेले. मुख्यमंत्र्यांच्या जन्मदिनाचे औचित्य साधून रेणुका गोंधळी यांनी आपल्या मजुरीच्या पैशातील 101 रुपये मनिऑर्डरने मुख्यमंत्र्यांच्या वैद्यकीय सहायता निधीसाठी पाठविले. त्यासोबत मुख्यमंत्र्यांना लिहिलेल्या पत्रात त्या जन्मदिनाच्या शुभेच्छा देऊन म्हणतात “आपण माझ्या मोबाईलवरील संदेशाची दखल घेऊन माझ्या भाच्याला जीवनदान दिले. अशीच सेवा आपल्या हातून इतर सामान्यांची घडो यासाठी फुल ना फुलाची पाकळी म्हणून माझ्या मजुरीतील अल्प स्वरुपातील रक्कम मुख्यमंत्री वैद्यकीय सहायता निधीसाठी पाठवित आहे. आपणास परमेश्वर मोठे आयुष्य देवो, या राष्ट्राची सेवा करण्याचे भाग्य लाभो, हिच ईश्वरचरणी प्रार्थना.”

जाणिवेने लिहिलेले पत्र वाचून मुख्यमंत्री देवेंद्र फडणवीस यांच्या डोळ्यात अश्रूच तरळले. आज जन्मदिनानिमित्त त्यांना समाजाच्या सर्व स्तरातून मोठ्या संख्येने शुभेच्छा प्राप्त झाल्या. मात्र, ज्या घटकाच्या जीवनात सकारात्मक परिवर्तन घडावे यासाठी मुख्यमंत्री कटिबद्ध असतात. त्याच शेवटच्या घटकाचा प्रतिनिधी असणाऱ्या एका सर्वसामान्य नागरिकाकडून शुभेच्छांसोबत प्राप्त झालेली ही छोटीशी परंतु खूप मोलाची असणारी मदत आल्याचे पाहून मुख्यमंत्री सद्गदित झाले.
Labels:

Post a Comment

[facebook][blogger]

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget