मुंबईतील मेट्रो प्रकल्प बांधकामाच्या ठिकाणी गढूळ पाण्यामूळे आजार पसरविणाऱ्या डांसाच्या उत्पत्ती बाबत सदस्यांनी उपस्थ‍ित केलेल्या लक्षवेधी सूचनेला उत्तर देताना सागर बोलत होते.
सागर म्हणाले, मुंबई शहर व उपनगरात सूरू असलेल्या मेट्रो प्रकल्पाच्या ठिकाणी मुंबई मेट्रो रेल कॉपोरेशनच्या एजन्सीने डास प्रतिबंधाच्या कामांना सुरूवात केली आहे. यासाठी मुंबई महानगरपालिका आणि
एमएमआरडीएनेही स्वतंत्र यंत्रणा नेमली आहे. त्यांच्यामार्फत मलेरिया व डेंगी आजाराच्या रूग्णांचे दैनंदिन सर्वेक्षण करण्यात येत असून महापालिकेच्या इतर विभागांशी समन्वयाने वस्तीपातळीवर साथीच्या आजाराच्या नियंत्रण व प्रतिबंधासाठी खबरदारी घेण्यात येत आहे. आतापर्यंत डेंगी डासांची उत्पत्ती आढळलेल्या सोसायट्या, खासगी बांधकाम व्यावसायिकांसह आदी 151 जणांना नोटीसा जारी केल्या असून त्यांच्याकडून 14 हजार रूपयांचा दंडही वसूल करण्यात आला असल्याचे त्यांनी यावेळी सांगितले.
सागर पुढे म्हणाले, मुंबई मेट्रो लाईन-3 प्रकल्पांतर्गत स्थानकांच्या खोदकामा ठिकाणी जमीनीतून झिरपणा-या पाण्याचा निचरा करण्यासाठी प्रत्येक स्थानकात आवश्यक क्षमतेच्या पंपांची व्यवस्था
करण्यात आली आहे. या ठिकाणी डासांची उत्पत्ती होऊ नये यासाठी मुंबई महानगरपालिका, मेट्रो प्रशासन व संबधित कंत्राटदार यांच्या समन्वयाने नियमितरित्या डास अळीनाशक फवारणी व धुम्र फवारणी करणे अशा उपाययोजना करण्यात येत आहेत. प्रसंगी प्रत्येक सोसायटीतील लोकांचा मोहिमेत सहभाग घेण्याचा प्रयत्न केला जात असल्याचे त्यांनी यावेळी सांगितले. एका उपप्रश्नाला उत्तर देताना सागर म्हणाले, मुंबई महानगरपालिकेच्या सर्वेक्षणात विधानभवन मेट्रो स्टेशनच्या बांधकामाच्या ठिकाणी जमिनीतून झिरपणा-या पाण्यामध्ये मलेरिया पसविणा-या ऍनॉफिलीस जातीच्या डासांची उत्पत्ती दोन ठिकाणी आढळून आली असून या ठिकाणी किटकनाशक फवारणी करून डासांची उत्पत्तीस्थाने नष्ट करण्यात आली आहे. या परिसरामध्ये महानगरपालिकेमार्फत ताप सर्वेक्षण करण्यात आले असून सर्वेक्षणादरम्यान मलेरिया व डेंग्यूच्या आजाराची लागण झाल्याचे आढळून आले नाही. काही दिवसांअगोदर या भागातील गाडगीळ परिवाराला या आजाराची लागण झाल्याची घटना घडली होती त्यांची राज्यशासनाने गंभीर दखल घेतली असून तशी लागण यापुढे कोणत्याही परिवाराला होणार नाही यांची दक्षता घेतली जाणार आहे. तसेच महानगरपालिका क्षेत्रात सुरू असलेल्या प्रकल्पाच्या पारिसरात रोगांचा प्रादूर्भाव टाळण्यासाठी आरोग्य तज्ज्ञांची नेमणूक केली जाईल,
अशी ग्वाही त्यांनी यावेळी दिली.
यावेळी सदस्य सर्वश्री शरद रणपिसे, भाई गिरकर, हेंमत टकले, रामहरी रुपनवर आणि विद्या चव्हाण यांनी चर्चेत सहभाग घेतला.
टिप्पणी पोस्ट करा